O sábado 8 de novembro de 2025, arrancamos cara a Allariz con 35 persoas e 2 máis que se unirían ao chegarmos ao destino. Incialmente había 43 persoas inscritas pero hai 6 que, por diversas causas, son baixa.
Guiadas por Manuel Gallego da cooperativa Xeitura, visitamos a aldea de Santa Mariña, a igrexa románica e o seu entorno. A continuación baixamos por un bosque autóctono pisando ourizos, follas de castiñeiro e de carballo ata chegar ao Asento de Mariña. A carón deste está o Forno da Santa onde baixamos á cripta que foi no seu tempo unha sauna do século VI tal como o datou Rebeca Blanco no seu estudo a partir da argamasa analizada. Seguimos polo Penedo da Moura, as Pioucas da Santa e rematamos no castro de Armea que está sendo escavado.
O conxunto de máis de tres kilómetros ten un interese paisaxístico e arqueolóxico de moito valor que deixou ás presentes marabilladas; hai que resaltar que tamén axudaron moito as explicacións detalladas de Manuel.
A continuación traslado en bus ata o antigo curtidoiro da vila e xantar no restaurante Acea da Costa cun merecido cocido, sopa e empanada.
Pola tarde visitamos a Feira de outono instalada no pavillón do Instituto, o museo das Clarisas onde admiramos a talla da Virxe Abrideira: peza única regalada ás monxas por Dona Violante. Esta peza en marfil do século XIII é das escasas que hai na península.
Finalmente visitamos a Fundación Vicente Risco onde nos ensinaron a exposición permanente con obras e obxectos do escritor ourensán, a exposición Risco e Castelao: Galiza como proxecto vital e unhas salas dedicadas á obra O porco de pé con espazos que recrean escenas da novela.
Regresamos cansos pero moi satisfeitos dunha xornada chea de experiencias; as excursionistas amosaron os seus parabéns para os organizadores, tanto para Encarna Santos como para Fernando.