Presentación libro: Nones Araújo

O Ateneo Atlántico ten o pracer e o orgullo de presentar a última novela da nosa socia e amiga Nones Araújo. Tratase da novela ‘A madriña’, que foi galardonada co premio Alén do Concello de Ares e a Editorial Hércules. No acto, que terá lugar o xoves 16 de novembro, ás 19.30 na biblioteca da EMAO, a autora estará acompañada por Enrique León e a editora, Laura Rodríguez.

A Madriña

Hércules de Ediciones, 2023.
Era o ano 57 do século pasado. A madriña, muller entrada en anos, obriga ao destino a poñer nas súas mans a vida dunha nena que, filla de pais emigrados, queda baixo a súa tutela, en total desamparo. A madriña, rexida polos mandamentos divinos e convencida de que o sufrimento e o sacrificio son virtudes e non atrancos, educa a afillada nunha pedagoxía austera na que sempre un censor, un deus ou un xuíz avaliarían a diario os feitos da pequena.
A escola, as cartas e as fotos que chegan polo océano son as únicas alegrías que ela lle permite nos anos da nenez compartida. Só o avó paterno é quen de demostrarlle cariño, pois a madriña, afastada da familia, interpreta o mundo como un val de bágoas, sen saber atopar ningún pracer na vida.
Ao regreso dos pais de Venezuela, a vida familiar da nena e dos dous irmáns énchese de gozo pero tamén de desacougos. Só as festas en agosto na aldea mudan o mundo: o bo sempre abonda e o malo semella escaso.
Pasados uns anos, é na cidade de acollida onde comeza o futuro da pequena xa adolescente. Aí vive descubertas marabillosas e outras desacougantes que a empurran a medrar á présa.
Estaba escrito nas estrelas —ou só no corazón— que o azar fixese ben o seu traballo: foi o amor o que, agochado tanto tempo, lle recuperou a nenez, sen rancor.

Nones Araújo

Nones Araújo naceu en Riós (Ourense no ano 1953, viviu en Verín ata os 13 anos e formou en Vigo, co seu compañeiro de vida, a súa familia: dúas fillas e un neto.
Mestra vocacional, xa xubilada, exerceu a profesión en distintas especialidades, adquiridas ao longo da carreira docente: Preescolar, Pedagoxía Terapéutica, Lingua Castelá na Segunda Etapa de E.X.B. e Lingua Galega. Nos últimos quince anos deu clases de secundaria no IES Alexandre Bóveda de Vigo. En etapas anteriores, no colexio Dr. Fleming, no CEIP Balaídos e no colexio San Francisco, de Educación Especial.
Comezou a escribir e a participar en certames literarios na xubilación. En 2020 conseguiu o VIII Concurso de Microrrelatos Ribeira Sacra de Parada de Sil. En 2021 gañou o XXIII Certame de Narración Curta Ánxel Fole do Concello de Lugo, o Certame Literario Exeria, convocado polo Ateneo Atlántico de Vigo xunto coa Fundación Xoán Piñeiro e tamén recibiu o Pedrón de Ouro.
Ademais de escribir, a arte, tocar a pandeireta, cantar cantigas maliciosas, ler e compartir cos amigos andainas e conversas, enchen felizmente o seu retiro dourado.

(Textos da Ficha do libro na editorial Hércules)