Club de lectura. Os anos tranquilos

Os anos tranquilos, de Llerena Perozo Porteiro, é o libro elixido polo Club de lectura do Ateneo Atlántico para ler ao longo do mes de febreiro. A xuntanza terá lugar o martes 5 de marzo, a partir das 18.30 horas no espazo Ateneo. Na xuntanza contaremos coa presenza da autora.

Os anos tranquilos

Cando María García nace, a comezos do século XX nunha aldea da montaña asturiana, as súas cartas semellan estar botadas. Todo parece indicar que o destino dela será medrar, vivir e morrer onde naceu. Mais aquela rapaza, que cría contar coas súas mans como único patrimonio, descubrirá axiña un comodín extraordinario que lle vai permitir percorrer medio mundo: a súa mente prodixiosa. Coa imaxinación, co instinto e coa intelixencia, María sorteará os mares bravíos das normas, vencerá atrancos e prexuízos e superará fronteiras físicas, mentais e sociais. «Os anos tranquilos» é a historia vertixinosa dunha muller extraordinaria que, ademais de traballar coas súas mans, pode ser quen de vivir como unha gran señora pola súa capacidade de aprendizaxe e mesmo, cando é preciso, empregar as armas necesarias para matar.
(Da ficha do libro en Edicións Xerais)

Llerena Perozo Porteiro

Llerena Perozo Porteiro (Vigo, 1974) non ten un oficio ao uso. Desde 2020 vive na Gargalleira (Silleda), onde habita un proxecto vital e social de volta á natureza, ao rural e á cultura. Ademais do seu activismo ecofeminista, a súa traxectoria profesional inscríbese nos eidos da cultura, do medio ambiente e da igualdade. Colaboradora regular en medios de comunicación («Praza Pública», «La Voz de Galicia», Radio Galega – TVG2, «Grial»), publicou tres libros de divulgación sobre igualdade e ecoloxía, varios libros destinados ao público infantil e xuvenil, así como as novelas «Pérez. Historia dun triunfo» (2021) e «Os anos tranquilos» (Xerais, 2024).
(Da ficha da autora en Edicións Xerais)