Co título ‘Vítimas da Guerra Civil e da ditadura na provincia de Pontevedra’, o Ateneo Atlántico -coa subvención do Goberno de España, Ministerio de Política territorial e Memoria democrática- organiza un ciclo de actividades que se desenvolverán en Vigo durante o primeiro semestre de 2026 en diferentes horarios e espazos que se poden consultar en ateneoatlantico.gal
Memoria democrática
A Ditadura non foi o longo período de paz e prosperidade que evoca na mocidade a extrema dereita, utilizando nos seus bulos os falsos mitos creados pola propaganda do propio réxime, nunha campaña de branqueamento do franquismo que tenta espallar nas novas xeracións a desafección pola democracia.
O Ateneo Atlántico de Vigo considera, xa que logo, que para desenvolver unha cidadanía democrática consciente, é urxente combater a desinformación e a manipulación, e tenta colaborar no coñecemento dese perverso periodo da nosa historia con este Programa de actividades sobre a Memoria Democrática nun ámbito moi próximo: as vítimas da provincia de Pontevedra, tras o golpe de estado do 36 e na ditadura.
En coherencia coa nosa traxectoria de foro de debate aberto, este Ciclo -que conta co apoio económico do Ministerio de Política Territorial e Memoria Democrática– preséntase en moi diversos espazos, apoiándose tanto en recoñecidos profesionais da investigación histórica como en testemuños das propias vítimas ou dos seus familiares e amigos.
Porque a democracia esixe non só desvelar o carácter cruel e represor da ditadura franquista senón tamén, moi especialmente, que a sociedade recoñeza a dignidade e o valor daqueles homes e mulleres que loitaron e sofreron pola liberdade e a democracia para que non sexan esquecidos.
Programa
- 1. O papel da investigación na Memoria democrática
- Xoves 22 de xaneiro de 2026. 19.30 horas
- Auditorio do Marco
- Conchi López e Montse Fajardo
- 2. Vítimas do golpe de estado. Testemuña de familiares e amigos
- Martes 10 de febreiro de 2026. 19.30 horas
- Local da AAVV Praza da Miñoca
- Manuel Bragado, Pepe Álvarez Cáccamo, Jacinto Mosquera e Xavier Moreda
- Coordina Miguel Pérez Pereira
- 3. A represión franquista nos campos de concentración
- Mércores 25 de marzo de 2026. 14.50 horas
- IES Politécnico
- Cristina Caramés e XM Domínguez Freitas
- 4. Presentación da Banda deseñada ‘Regreso á Illa de San Simón’ de Kiko Dasilva
- Martes 14 de abril de 2026. 12.50 horas
- IES do Castro
- Kiko Dasilva
- 5. Perseguidos da ditadura
- Mércores 15 de maio de 2025. 19.30 horas
- Salón de actos da Once
- Carlos Núñez, Miguel A. Gómez ‘Gus’, Silvia Fernández Quinteiro e Flor Baena
- 6. O dereito á memoria, á dignidade e á reparación
- Xoves 11 de xuño de 2026, 19.30 horas
- Salón de actos do Marco
- Francisco Etxeberría Gabilondo